Кызматташтыкты чыңдоо ниетибизди ырастадык. Садыр Жапаров билдирүү жасады
Жазылуу
Өлкө башчысы чек ара маселесин биротоло чечүү мындан аркы кыргыз-өзбек мамилелерин өнүктүрүүгө жардам берерин айтты.
БИШКЕК, 27-янв. — Sputnik. Президент Садыр Жапаров бүгүн, 27-январда, өзбек лидери Шавкат Мирзиёевдин Кыргызстанга болгон мамлекеттик сапарынын алкагында сүйлөшүүлөрдүн жыйынтыгы боюнча билдирүү жасады. Текстин маалымат кызматы жарыялады.
Урунттуу учурлары:
Кыргызстан менен Өзбекстандын ортосундагы баарын камтуучу стратегиялык өнөктөштүк жөнүндө декларацияга кол коюлду;
Бүгүн биз үчүн тарыхый күн. Кыргызстан менен Өзбекстан мамлекеттик чек араны делимитациялоо процессин аяктап, кыргыз-өзбек мамлекеттик чек арасы жөнүндө келишимге ратификациялык грамоталар менен алмашты, ошентип чек ара маселелерине чекит коюлду;
Быйыл эки мамлекеттин ортосунда дипломатиялык мамилелер орногондугунун отуз жылдыгы белгиленет. Мааракелик датаны масштабдуу түрдө белгилөө макулдашылды;
Кыргызстанда автомобиль жана коммерциялык техникаларды, электр техникалык жабдууларын, электр эсептегичтерди чогултуу, ошондой эле Кыргызстандын көмүр кендерин иштетүү, терини кайра иштетүү жана Нарын облусуна картошка өстүрүү жаатында долбоорлорду ишке ашыруу боюнча макулдашылды;
Өзбек-кыргыз өнүктүрүү фонду менен өнөр жай кооперациясын өнүктүрүүгө багытталган биргелешкен долбоорлорду каржылоо макулдашылды;
Кытай — Кыргызстан — Өзбекстан темир жолунун курулушу, автомобиль менен жүргүнчүлөрдү жана жүк ташууну көбөйтүү бүгүнкү сүйлөшүүлөрдүн күн тартибинде болду;
Быйыл Кыргызстан менен Өзбекстандын маданият күндөрүн өткөрүү, туризм, билим берүү жана илим, саламаттыкты сактоо, жаштар маселелери тармагында өз ара кызматташууну кеңейтүү боюнча макулдашуулар болду.
Ошондой эле өлкө лидери чек ара маселесин биротоло чечүү мындан аркы кыргыз-өзбек мамилелерин өнүктүрүүдө, чек ара байланыштарын чыңдоодо негизги ролду ойнорун айтты.
"Жалпысынан биз кыргыз-өзбек ар тараптуу кызматташтыгын мындан ары да чыңдоого бекем ниетибизди ырастадык. Бизде эки элдин кызыкчылыгына жооп берген көптөгөн иштер жана пландар бар. Кыргызстан үчүн Өзбекстан жакын дос жана ишенимдүү коңшу экенин дагы бир жолу баса белгилей кетейин", — деди Жапаров өз билдирүүсүндө.
Ал Шавкат Мирзиёевге жана өзбек делегациясынын мүчөлөрүнө натыйжалуу иш үчүн ыраазычылык билдирип, эки өлкөгө жана эл-журтка тынчтык, туруктуулук, өсүп-өнүгүү каалады.
