Мамлекеттик мекемелерге "Майлы-Суу" лампа заводунан товар сатып алуу сунушталды
20:40 09.11.2022 (Жаңыртылды: 23:08 14.01.2023)
© Sputnik / Актан Темирканов
Жазылуу
Ишкана өндүргөн товарлардын тизмеси да жарыяланды.
БИШКЕК, 9-ноя. – Sputnik. Өлкө башчы Садыр Жапаров шаар түзүүчү ишканага мамлекеттик колдоо көрсөтүү жана жарык-техникалык тармакты андан ары өнүктүрүү, ошондой эле Жалал-Абад облусунун Майлы-Суу шаарынын социалдык-экономикалык абалын жакшыртуу боюнча тескемеге кол койду. Бул тууралуу президенттин маалымат кызматы кабарлады.
Министрлер кабинетине бир айлык мөөнөттө республикалык бюджеттен каржылануучу мамлекеттик органдарга, бюджеттик уюмдарга жана мамлекеттик мекемелерге, жергиликтүү бюджеттен каржылануучу жергиликтүү өз алдынча башкаруу органдарына, атайын эсептери жана фонддорунун каражаттары бар уюмдарга, ошондой эле мамлекеттик каражаттардын, мамлекеттик органдардын же жергиликтүү өз алдынча башкаруу органдарынын каражаттарынын эсебинен түзүлгөн башка юридикалык жактарга товарларды бир булактан методу менен "Майлы-Суу лампа заводу" ачык акционердик коомунан түздөн-түз сатып алууларды жүзөгө ашыруу жөнүндө талаптарды белгилөө тапшырылган.
Уставдык капиталындагы мамлекеттик үлүш 50 жана андан ашык пайызды түзгөн мамлекеттик жана муниципалдык ишканаларга, акционердик коомдорго, анын ичинде алардын туунду чарбалык коомдоруна товарларды "Майлы-Суу лампа заводу" ачык акционердик коомунан сатып алуу сунушталган.
"Майлы-Суу лампа заводу" ачык акционердик коому өндүргөн товарлардын тизмеги:
25, 40, 60, 75, 95, 100, 150 Вт жалпы багыттагы чыңалуу лампалары;
200 Вт, 300 Вт жана 500 Вт атайын багыттагы ири габариттүү чыңалуу лампалары;
25, 40, 60, 75, 95, 100 Вт декоративдүү тунук колбадагы шамчырактар үчүн чыңалуу лампалары;
Шамчырактар, портативдик тигүү машиналары жана ПШ 15 Вт муздаткычтар үчүн чыңалуу лампалары;
40, 60, 95, 100 Вт жергиликтүү жарыктандыруу шамчырактары үчүн чыңалуу лампалары;
4, 5, 6, 7, 8, 9, 10, 12 Вт (LED) жалпы жарыктандыруу үчүн жарык чыгаруучу диоддору бар лампалар;
чыңалуусу 12, 24 Вт жана кубаттуулугу 5, 10 жана 21 Вт болгон жол транспорт каражаттары үчүн чыңалуу лампалары (токтоо белгисинин чырактары);
айнек жиптеринен жасалган ровинг;
айнек жиптеринен жасалган фибра.
Белгилей кетсек, быйыл "Майлы-Суу" лампа заводу банкрот болуп, бардык үлүшү мамлекеттин менчигине өткөнү маалым болгон. Жакында эле заводдун ишин жандантууга бюджеттен 1 миллиард сом бөлүнгөн.
