Менсеитова: Ысык-Көлдө блокадачыларга арналган мемориалдык такта илинди
Жазылуу
КР маданиятына эмгек сиңирген ишмер, Бишкектин ардактуу ардагери, эстеликтерди сактоо жана түбөлүккө калтыруу боюнча комиссиянын төрайымы, Чоң-Арыктагы музейдин директору Калбүбү Менсеитова жаштарга согуш кандай азапка саларын түшүндүрүү керектигин айтты.
2022-жылдын октябрь айында Ысык-Көлдүн Чоӊ-Сары-Ой, Түп, Ак-Суу аймактарына Ленинград блокадачыларына арналган мемориалдык такта илинди. Бул тууралуу Калбүбү Менсеитова Sputnik Кыргызстан радиосунун эфиринде маек куруп жатып билдирди.
Менсеитова: Ысык-Көлдө блокадачыларга арналган мемориалдык такта илинди
Анын айтымында, мындай мемориалдык такта өлкөнүн ар бир облусунда бар.
"Ысык-Көлдө орнотулчу Ленинград блокадачыларына арналган мемориалдык такта 2019-жылы эле даярдалган. Пандемиядан улам жылып отуруп 20-21-октябрь күндөрү гана барып коюп келдик. Иш-чара Ленинград блокадасынын кыргыз коомунун төрагасы Марат Кутановдун жетектөөсүндө өттү. Ленинградда курчоодо калган балдарга арналып уюшулган үйлөргө, Жеңиш паркына барып жергиликтүү эл менен жолуктук. Ленинградда 900 күн курчоодо калган блокадачылар тууралуу балдарга айтып берип, согуш адамзатын кандай азапка саларын түшүндүрсөк алардын патриоттук сезими күчөйт. Улуулар дайыма тарыхты айтып, ушундай эскерүү иш-чараларын өткөрүп турушу зарыл. Буга чейин 2015-жылы Улуу Жеӊиштин 70 жылдыгына карата жүрүшкө чыгып, Ысык-Көлгө барган элек. Анда 16 жашында Ленинграддан эвакуацияланган 150 баланы камкордукка алган Токтогон Алтыбасарова апа тирүү болчу. Чогуу Лениградда курчоодо калган балдарга арналып уюшулган үйлөргө барып келгенбиз. Бул балдар үйлөрүнүн уюшулганына быйыл 8-августта 80 жыл толду", — деди Менсеитова.
Ал жаш муундарга тарых тууралуу кененирээк айтып берип, эстеликтерди сактоо жана сыйлоого үйрөтүү керектигин кошумчалады.
