Жуматаев: Улуттук илимдер академиясы "Курчатов институту" менен кызматташат
Жазылуу
Улуттук илимдер академиясынын президенти, академик Мурат Жуматаев илимде техникалык, аспаптык база түзүлсө жакшы жыйынтык болорун айтты.
Улуттук илимдер академиясы Россиянын алдыңкылардан болгон "Курчатов институту" илимий-изилдөө борбору менен кызматташат. Бул тууралуу Мурат Жуматаев Sputnik Кыргызстан радиосуна маек куруп жатып билдирди.
Жуматаев: Улуттук илимдер академиясы "Курчатов институту" менен кызматташат
Жуматаев: Улуттук илимдер академиясы "Курчатов институту" менен кызматташат
Анын айтымында, жаш илимпоздордун тажрыйба алмашуусунда, илим изилдөөсүндө эл аралык кызматташуу абдан жакшы натыйжасын берет.
"Ушул жылдын аягында Улуттук илимдер академиясынын делегациясы Россияга барып, Илимдер академияларынын эл аралык ассоциациясынын отурумуна катышты. Ал жыйын Михаил Ломоносов атындагы Москва мамлекеттик университетинин жана "Курчатов институту" улуттук илимий-изилдөө борборунун базасында өтүп, актуалдуу маселелер талкууланды. Ал жакта "Курчатов институтунун президенти Михаил Ковальчук менен сүйлөшүп, кызматташуу боюнча сөз болду. Ал биздеги абалды жакшы билгендигин айтып, генетиктер, физиктер келип илим изилдөөлөрдү жүргүзүүгө мүмкүнчүлүк бар экенин билдирди. Азыркы учурда "Курчатов институту" ядролук илим жана техника боюнча гана эмес, физиканын ар кандай тармактарындагы эксперименталдык мүмкүнчүлүктөрү боюнча да Россиядагы эң ири илимий борборлордун бири болуп саналат. Борбордун курамына адистештирилген институттар жана илимий-техникалык комплекстер кирет. Бул биз үчүн абдан чоң аянтча болуп, жакшы жыйынтыктарды көрсөтүүгө шарт түзүлөт. Анткени техникалык, аспаптык база болсо, кыргыз илимпоздору жакшы ачылыштарды жасоого кадам жасамак",— деди Жуматаев.
Ошондой эле академик "Курчатов институту" менен келишим түзүлүп калса Улуттук илимдер академиясындагы биотехнология, фитотехнология, геология, биология, физика институттарынын адистери Россияга барып, Кыргызстан үчүн пайдалуу илимий иштерди жасаганга мүмкүнчүлүк ачыларын кошумчалады.
