Каримов: брекет бардык эле тиши кыйшык адамга жарай бербейт
Жазылуу
Борбордогу стоматологиялык клиникалардын биринин директору Нургазы Каримов брекетти чечкенден кийин да беш жылдай дарыгердин көзөмөлүндө болуу зарылдыгын айтты.
Брекетти коюуга эң ыңгайлуу курак 13-14 жаш. Бул тууралуу Нургазы Каримов Sputnik Кыргызстан радиосунун эфиринде маек куруп жатып билдирди.
Каримов: брекет бардык эле тиши кыйшык адамга жарай бербейт
Анын айтымында, учурда жаштар брекет коюуну модага айландырып жатат, бул ден соолук үчүн кооптуу.
"Биз, тилекке каршы, тиштин көрүнүп турган сырткы келбетине көп көңүл буруп, бирок анын тамырын капарыбызга албайбыз. Брекет туура эмес коюлуп калса мына ушул тамырларына доо кетирет. Тиш өзү сүйрү формада, анын эң жука жери 1 миллиметр, калың жери 5-7 миллиметрди түзөт. Келбетин түздөөгө далалаттанып жатып, анын ошол жука жерин брекет тешип, ал эми калың жагы кысылып калышы ыктымал. Ошондой эле, мисалы, бир жыл койдуруп жүрсө, тиштери түзөлүп калган соң дагы 5 жылдан кем эмес дарыгердин көзөмөлүндө болуп туруусу зарыл. Анткени тишти күч колдонуу менен түздөгөн соң анын тамыры толугу менен ошондой болуп ыңгайлашышы керек. Бул убакта тамыры жылдырылган жерлер бошойт, аны дарыгерлер атайын кальций жана башка дарылар менен толуктап турушу шарт. Болбосо кайра эле бир канча убакыттан кийин мурдагы калыбына келип же андан да жаман абалга түшүп калышы мүмкүн", — деди Каримов.
Ал брекет койдурууга шашылбай, алгач ага туура көрсөтмө алуу зарылдыгын кошумчалады.
