Осмоналиев: төрагалык мен үчүн да күтүүсүз болду
Жазылуу
Президентке караштуу Мамлекеттик тил жана тил саясаты улуттук комиссиясынын төрагасы, профессор Каныбек Осмоналиев аталган кызматка кантип дайындалып калганын айтып берди.
Тил комиссиясына төрагалык кызмат сунушталганына мен өзүм да алгач таң калдым. Бул тууралуу Каныбек Осмоналиев Sputnik Кыргызстан радиосуна маек куруп жатып билдирди.
Осмоналиев: төрагалык мен үчүн да күтүүсүз болду
Анын айтымында, мекеменин аталышына да өзгөртүү киргизилип, иштөө саясаты белгиленген.
"Мен Улуттук тил комиссиясына жетекчи болуп дайындалган соң социалдык тармактарда ар кандай кептер жүрдү. Коомчулук өзгөчө "математик кантип тил комиссиясын башкарат" деген суроону коюп жатты. Ачыгын айтканда, мага бул кызматты жетектөө сунушу түшкөндө өзүм да таң калдым. Бирок өлкө башчысы бир канча олуттуу себептерди айткан соң ишти алып кетүүгө бел байладым. Президент "молдо болгон үчүн дин комиссиясын жетектедиңиз беле" деп маселени кабыргасынан койду. Өзүңөр билгендей, мен ал жакта да иштеп, чоң-чоң реформаларды жасаганбыз. Биздин коомдо кайсы бир тармакты ошол багыт боюнча адис гана жетектеш керек деген түшүнүк сиңип калган. Бирок иш жүзүнө келгенде тил саясатын жүргүзүүдө менин теорик-физик катары иш тажрыйбам, билим берүү жаатындагы көп жылдык эмгегим президент тарабынан коюлган конкреттүү тапшырмаларды аткарууга өбөлгө түзөт. Жаңы Конституцияда мамлекеттик (кыргыз тили), расмий (орус тили) жана башка этностордун тилдерин өнүктүрүүгө мамлекет шарт түзүүсү зарыл деп жазылган. Башкача айтканда, өлкөдө тил саясаты абдан толеранттуу жолду тандаган. Мына ушул ишти аркалоо дагы биздин улуттук комиссияга жүктөлүп отурат", — деди Осмоналиев.
Ал тил комиссиясынын мурдагы жетекчиси, академик Сыртбай Мусаевдин башка кызматка барышы мүмкүндүгүн кошумчалады.
