Мукаев: Евразиялык экономикалык форумга 600дөн ашык адамдын катышуусу күтүлүүдө
Жазылуу
Экономика жана коммерция министрлигинин ЕАЭБ боюнча башкармалыгынын өкүлү Нурсултан Мукаев 26-27-майда өтүүчү Евразиялык экономикалык форумга даярдыктар кызуу жүрүп жатканын белгиледи.
Евразиялык экономикалык форумга окумуштуулар, ар кандай институттардын өкүлдөрү, мурдагы саясатчылар болуп 600дөн ашык адамдын катышуусу күтүлүүдө. Бул тууралуу Нурсултан Мукаев Sputnik Кыргызстан радиосуна маек куруп жатып билдирди.
Мукаев: Евразиялык экономикалык форумга 600дөн ашык адамдын катышуусу күтүлүүдө
Анын айтымында, быйыл Евразиялык экономикалык биримдикке Кыргызстан төрагалык кылууда.
"Евразиялык экономикалык форум быйыл 26-27-майда Бишкекте өтөт. Анын негизги максаты — ишкерлер, бизнес-ассоциациялар жана мамлекеттик органдардын ортосундагы байланышын бекемдөө. Анын алкагында кеңеш, сын-пикир, диалог жүргүзүү каралган. Форумда мамлекет башчылардын деңгээлинде пленардык сессия болот. Ошондой эле алты панелдик дискуссияда ЕАЭБдин 2025-жылга чейинки өнүгүүсү, каржы рыногу, айыл чарба, өнөр жай, энергетика жана туризм, жаштар саясаты, электрондук соода-сатыкты камтыган жаңы агымдар боюнча талкуулар жүрөт. Ошол эле электрондук соода-сатык абдан маанилүү тармак. Транспорттук коридорлорду түзүү жана биздин өлкө үчүн маанилүү болгон ар кандай тоскоолдуктар боюнча маселелер көтөрүлөт. Форумга ЕАЭБге мүчө эмес өлкөлөрдөн дагы окумуштуулар, бул багытта кызыкчылыгы бар институттардын өкүлдөрү, мурдагы саясатчылар жана башка болуп жалпы 600дөн кем эмес адамдын катышуусу күтүлүүдө", — деди Мукаев.
Ошондой эле быйыл 2-февралда Евразиялык экономикалык комиссияга 10 жыл толгонун белгилеп, анын алкагында ЕАЭБге мүчө-өлкөлөрдө комиссиянын өкүлдөрү, бизнес, мамлекеттик органдар орчундуу маселелерди талкуулап жатканын кошумчалады.
