Опош: креативдүү индустриянын өкүлдөрүнүн автордук укугу корголушу зарыл
Жазылуу
Дизайнер, "7-Асман" чыгармачылык студиясынын негиздөөчүлөрүнүн бири Миррахим Опош сүрөтчү, кийим дизайнери жана композиторлорго арналган "Искусство — креативдүү индустриянын өнүгүүсүнүн негизи" аталышындагы семинар өткөрүлгөнүн айтты.
"7-Асман" чыгармачылык студиясы бир топ жылдан бери өтө маанилүү долбоорлорду ишке ашырып келет. Композитор, анимациялык сүрөтчү, дизайнер, театр актерлору менен биргеликте чыгармачыл инсандардын консорциуму түзүлүп жатат. Биздин долбоорлордун басымдуу бөлүгү салттуу маданиятка багытталган. Бул тууралуу Миррахим Опош Sputnik Кыргызстан радиосунда маек куруп жатып билдирди.
Опош: креативдүү индустриянын өкүлдөрүнүн автордук укугу корголушу зарыл
Анын айтымында, креативдүү индустриянын өкүлдөрүнүн автордук укугу корголушу зарыл.
"Акыркы учурда өлкөдө креативдүү индустрияга басым жасалып, өнүгө баштады. Бул адамдын жөндөмү, шыгы, акыл-эси менен өндүрүп чыгарган продукциясы же чыгармалары. Креативдүү индустрия креативдүү экономикага өтүп, жасаган эмгектер сатыла баштады. Бул жерде авторлор өздөрү ишкерлик кылат же башка адамдар ошол эмгекти колдонуп бизнес жасайт. Ошентип бул жерде жараткан чыгармаңа ээлик кылуу, автордук укук маселеси чыкты. Жаратмандардын, чыгармачыл инсандардын, авторлордун (сүрөтчү, кийим дизайнери жана композитор) ишмердигин колдоо жана кесипкөй искусствону өнүктүрүү максатында "Искусство — креативдүү индустриянын өнүгүүсүнүн негизи" аталышындагы семинар болуп өттү. Иш-чара интеллектуалдык менчик жана инновациялар мамлекеттик агенттиги (Кыргызпатент) менен биргеликте уюштурулду. Семинарда автордук укук, товардык белгилерди каттоо, өнөр жай үлгүлөрүн укуктук коргоо, чыгармачыл ишмердикти колдоо жана коргоо маселелери талкууланды", — деди Опош.
Ал Кыргызстандын экономикасын креативдүү индустрия жана туризм аркылуу өнүктүрүү мүмкүнчүлүгү жогору экенин кошумчалады.
