Осмонов: инфаркт болгондо алгачкы алты саат "алтын убакыт" болуп саналат
Жазылуу
Саламаттык сактоо министрлигинин кардиологу жана башкы аритмологу Дамир Осмонов учурда өлүмгө кептеген кан тамырга байланыштуу оорулар дүйнөдө алдыңкы катарда экенин белгиледи.
Инфаркт болгондо алгачкы алты саат "алтын убакыт" болуп саналат. Ошол учурда медициналык көмөк көрсөтүлсө кесепетин алдын алууга болот. Бул тууралуу Дамир Осмонов Sputnik Кыргызстан радиосунда маек куруп жатып билдирди.
Осмонов: инфаркт болгондо алгачкы алты саат "алтын убакыт" болуп саналат
Анын айтымында, инфаркт негизинен көптөгөн оорунун акыркы стадиясы деп эсептелинет.
"Инфаркттын эң негизги себептеринин бири — атеросклероз. Бул учурда кан тамырдын ичине май топтолуп, холестерин тамырдан кан өткөрбөй калат. Адатта көкүрөк кысылып дем жетпей, жүрөктүн согуусу ылдамдап же жайлайт. Ошого байланыштуу баш айланып же көз караңгылашат. Айрым учурларда адам эс-учун жоготушу ыктымал. Инфаркттын дагы бир белгиси — адам кубарып, денесинен муздак тер чыгат. Эгерде ушундай симптомдор байкалса, тез арада медициналык жардам үчүн кайрылуу керек. Инфаркт болгон учурда биринчи алты саатта көмөк көрсөтүү оңой. Ошондуктан бул убакыт "алтын саат" катары сыпатталат. Абалга жараша диагностикалык процедураларды жүргүзүп, тамырларды ачууга мүмкүндүк жаралат. Ал эми медициналык жардам кечеңдей берсе кан тамырлар кысылып, кан жетпей жүрөктүн булчуңдары өлөт. Натыйжада оору күчөп, майыптыкка, ал тургай өлүмгө чейин жеткириши ыктымал", — деди Осмонов.
Медик туура тамактануу менен инфаркттын алдын алса боло турганын кошумчалады.
