Балыбаев: тил жөнүндө мыйзамга эмес, айрым нормаларына каршыбыз
15:05 10.02.2022 (Жаңыртылды: 15:06 10.02.2022)
Жазылуу
НТС телекомпаниясынын генералдык директору Миржан Балыбаев мамлекеттик тил жөнүндө мыйзамды жеке телекомпаниялардын аткарышы татаал болуп каларын белгиледи.
Тил жөнүндө мыйзамдын өзүнө эмес, айрым нормаларына каршыбыз. Анткени аталган мыйзамда сунушталган демилгелер эфирдин сапатын төмөндөтөт. Мындай пикирин Миржан Балыбаев Sputnik Кыргызстан радиосунда маек куруп жатып билдирди.
Балыбаев: тил жөнүндө мыйзамга эмес, айрым нормаларына каршыбыз
Анын айтымында, учурда иштеп жаткан мыйзамда көрсөтүлгөн эфирдеги мамлекеттик тилдин үлүшү 50 пайыз дегенди аткаруу оор болуп турганда аны көтөрүү кыйынчылыктарды жаратышы ыктымал.
"Мамлекеттик тил жөнүндө" мыйзам жалпысынан колдоого татыйт. Бирок анын ичинде талаш жараткан жагдайлар бар. Учурдагы мыйзамда телеканалдардагы көрсөтүүлөрдүн 50 пайызы кыргыз тилинде даярдалышы шарт. Бул мыйзамды кээ бир телеканалдар одно бузуп, айрымдары жарым-жартылай араң аткарууда. Ошондуктан учурда сунушталып жаткан эфирдеги мамлекеттик тилдин үлүшүн жогорулатуу демилгесин көптөгөн жеке телеканалдар аткара албай калышы ыктымал. Мисалы, карантин учурунда кыргыз тасмаларды "Кыргызфильмден" алганыбызда анын көпчүлүгү орус тилинде болуп, которуу зарылдыгы жаралды. Кыргыздын алтын фонду саналган "Кыргызфильмдеги" тасмалар мамлекеттик тилде болбой жаткан соң башка жагдайларды айтпай койсок болчудай. Мыйзамды талкуулоо учурунда мына ушул сыяктуу маселелер көтөрүлүп, мамлекеттик тил комиссиясы тийиштүү толуктоолорго бара турганы белгилеген. Анткени эфирдеги мамлекеттик тил тууралуу мыйзамдын талабын аткаруу үчүн кайталоолор коюлса контенттин сапаты начарлайт", — деди Балыбаев.
Ошондой эле ал мамлекеттен каржыланган телеканалдар мыйзамдын талабын аткарышы ыктымал экенин айтып, жеке телеканалдарга жеңилдиктер берилиши керектигин кошумчалады.
