БИШКЕК, 14-сен. — Sputnik. Ички иштер министринин мурдагы орун басары Курсан Асанов кармалды. Бул туурасында Асановдун жактоочусу Таалайгүл Токтакунова Sputnik Кыргызстанга билдирди.
ЖМКлар Асановду ИИМ кармагандыгын жазышууда, бирок министрликтин маалымат кызматынан комментарий бере элек.
Эске салсак, Курсан Асанов октябрь окуялары учурунда, тагыраагы, 6-октябрда ИИМдин жетекчилигине келип, бир нече күндөн кийин иштен кеткен.
Ал эми 26-январда кармалган. Ага 5-6-октябрь окуяларында Ички иштер министрлигин басып алууга аракеттенген деп Жазык кодексинин 245-беренесинин 1-бөлүгүнүн ("Имараттарды жана курулмаларды басып алуу") негизинде айып тагылган.
Экс-министр андан төрт ай өткөндөн кийин 12-апрелде Бишкек шаардык сотунун чечими менен баш коргоо чарасы өзгөртүлүп, үй камагына чыгарылган болчу.
