БИШКЕК, 2-сен. — Sputnik. Борбор калаада режиссёрлор Бакыт Мукул менен Дастан Жапар уулу тарткан "Акыркы көч" кинотасмасынын бет ачары болду. Ага Маданият министрлигинин өкүлдөрү, чыгармачыл адамдар жана кино сүйүүчүлөр катышты.
Тасманын режиссёру Бакыт Мукул фильм аркылуу элге чыгармачыл адамдын жашоосун көрсөткүсү келгендигин айтып берди.
"Чыгармачыл адамдар коомго тарбия берип, элдин алдында жүргөн катмар. Бирок ошол эле учурда жашоодо экинчи планда кала берет. Адамдарды алдыга үндөп, тарбиялаганына карабастан аларды алдап, колдонуп кетишет. Башкы каармандын азыркы жашоосу ак-кара түскө боёлгонун фильмдин ак-кара түстө тартылгандыгы менен берели дегенбиз", — деди режиссёр.
Кинокартина 2-сентябрдан тарта өлкөнүн кинотеатрларында коюлуп, прокатка чыкмакчы.
"Акыркы көч" көптөгөн эл аралык сынактарга катышып, соңку ирет Дакка эл аралык кинофестивалда баш байгеге жана Куала-Лумпурда өткөн эл аралык кинофестивалда атайын сыйлыкка татыган.
"Акыркы көчтө" улгайып калган белгилүү жазуучунун акыркы күндөрү чагылдырылат. Анда социалдык теңсиздик, жалпы маданият, искусство тармагында эмгектенген адамдардын камкордукка алынбаган абалы баяндалган.
