БИШКЕК, 27-авг. — Sputnik. Исламдын негизги жоболоруна каршы келет деген жүйө менен "Талибан"* Афганистандын коомдук жайларында музыканын жаңырышына тыюу салууга ниеттенип жатат. Бул тууралуу аталган топтун расмий өкүлү Забихулла Муджахид айтканын РИА Новости The New York Times басылмасына шилтеме кылып жазды.
"Исламда музыкага тыюу салынган", — деген ал.
Өкүл талибдер буга калкты бул сыяктуу иштерди жасабаганга басым кылып эмес, аларды көндүрүү аракети менен жетишерин билдирген. Муджахид "Талибан"* аларга каршы чыккандардан өч алууну баштады деген маалыматтарды жокко чыгарарын айтты.
Афган коомчулугундагы аялдардын келечектеги орду туурасындагы суроого алар акырындап өзүнүн иштерине кайтып келет деп жооп берген.
Ал мурда америкалык аскерлер менен иштеген бардык котормочулар жана башка адамдардын коопсуздугуна кепилдик берилерин билдирген. АКШнын афганистандыктарды эвакуациялоо аракеттерине талибдердин ичи чыкпагандыгын кошумчалаган.
"Алар биздин өлкөнүн ишине кийлигишпеши керек. Бизди адамдык ресурстардан – дарыгерлерден, профессорлордон жана башка адамдардан кол жуудуруп жатат. Андай кишилер бул жерге керек болчу", — деген Муджахид.
Өкүлдүн пикиринде, АКШда бул кишилердин идиш жуугуч жана ашпозчу болуп иштеши адамдык мамилеге жатпайт.
* — Кыргызстан, Россия жана бир катар мамлекеттерде тыюу салынган террордук уюм
