Белгилүү кинорежиссер Альгимантас Видугирис 1981-жылы энергетиктер жөнүндө "Жалаң эркектер" тасмасын тарта баштаган. Анда операторлук милдетти Манас Мусаев аткарып, сүрөтчүсү Өмөркул Бөрүбаев болуп, музыкасын Шандор Каллош жазган. Киночулар чоң дарыя, кокту-колоттордо иштеп, тик учак, оор техникаларды пайдаланган.
Кинокартина авариялык абалга кептелген жогорку чыңалуудагы электр чубалгыларын оңдогон адистердин эмгегине арналып, анда сүйүү, достук, адамдар ортосундагы мамиле көрсөтүлөт.
Тартуу учурун кинофотограф Александр Федоров мындайча эскерет:
"Ошол жылдары Кыргызстанда ГЭСтер биринин артынан бири курулуп, ата мекендик гидроэнергетика болуп көрбөгөндөй өнүккөн. "Жалаң эркектерди" тартууда режиссер Альгимантас Видугирис экстремалдуу кадрларды камерага өзү түшүргөн. Бизге гидроэнергетиктер кеп-кеңешин, жардамын берип, техникасы менен тасма тартууга көмөктөшкөн. Фильмди аяктап калганда актерлордун жүрүп бара жараткан автоунаага жүгүрүп жетип түшкөн эпизодун тартып калдык. Үчүнчү жолу тартылып жатканда башкы ролдогу Сүймөнкул Чокморов чалынып кетип, ооруп жүргөн бөйрөгү менен ташка тийип тура албай калган. Чыгармачыл топ Сүймөнкулду тик учак менен Фрунзеге жеткиргенбиз. Киночулар актеру жок калгандыктан дублер издеп таап, тартып бүтүрүшкөн. Ал эмгек ошондой кыйынчылыктар менен жаралган", — деди Федоров.
Кинофильмде Сүймөнкул Чокморов эр жүрөк бригадир Касымдын ролун аткарып, Дилором Камбарова, Советбек Жумадылов, Владимир Скоропись, Вячеслав Жолобов, Болот Макеев, Муса Дудаев, Елена Мельникова образ жараткан.
Аталган эмгек эл аралык фестивалдарда да ийгилик жараткан. Мисалы, Сириянын Дамаск шаарында өткөн эл аралык фестивалда "Күмүш кылыч", Чехияда "Хрусталь ваза" сыйлыгын алып, Франция, Өзбекстандан байгелүү кайткан.
