БИШКЕК, 13-авг. — Sputnik. Бишкекте соода-экономикалык, илимий-техникалык жана гуманитардык кызматташуу боюнча Кыргыз-Россия өкмөттөр аралык комиссиясынын маданият боюнча жумушчу жыйыны өттү.
Жыйындын жыйынтыктары боюнча Россиянын маданият министринин орун басары Ольга Ярилова айтып берди.
"Биздин Кыргызстан менен кызматташуу жаатындагы мүмкүнчүлүктөрүбүзгө чек жок. Бүгүнкү жумушчу топтун жыйынында дээрлик бардык тармактарды талкууладык. Мисалы, китепкана иши боюнча кызматташууну сүйлөшүп, мындан ары жаңылыктар жана жаңы долбоорлор менен алмашып турмай болдук. Россиянын бөлүшө турган тажрыйбасы арбын, өнөктөштөрүбүз менен биргеликте китепканаларды заманбап жашоого шайкеш келтирүү боюнча программаны ишке киргизип жатабыз. Театр жаатында дагы кызматташууну талкууладык. Министр менен гастроль уюштуруу мүмкүнчүлүгүн дагы сүйлөштүк", — деди ал.
Ярилова Россия быйыл Чыңгыз Айтматов атындагы орус драма театрынын гастролун күтүп жатканын белгиледи.
Ал ошондой эле эки өлкөнүн эриш-аркак жылынын жабылыш аземин атактуу аткаруучулардын катышуусунда уюштуруу макулдашылганын кошумчалады.
Ал эми Кыргызстандын маданият, маалымат жана жаштар саясат министри Кайрат Иманалиев Россиянын искусство жаатындагы окуу жайларына көбүрөөк студент жиберүүнү сунуштаганын айтты.
Жыйындын соңунда Улуттук китепкананын Чыңгыз Айтматов залында конференция өттү.
