Өлкөдө кыз-келиндер күрөшү өнүгүп баратканы өспүрүмдөр арасында кызыгууну жаратууда. Мындай пикирин Максат Оморов Sputnik Кыргызстан радиосунун эфиринде маек куруп жатып билдирди.
Оморов: Кыргызстанда аялдар күрөшүнүн өнүгүшүнө Айсулуу Тыныбекова жол ачты
Анын айтымында, өлкөдө аялдар күрөшүнүн өнүгүшүнө Айсулуу Тыныбекова жол ачып, көптөгөн адамдардын оюн өзгөрттү.
"Бүгүнкү күндө аялдар күрөшүнүн өлкөдө өнүгүү жолуна түшүшүнө Дене тарбия жана спорт академиясынын бүтүрүүчүсү Айсулуу Тыныбекованын салымы чоң. Балбан кызды ушул даражага жеткирген биздин окуу жайдын тарбиялануучусу Нурбек Изабековдун эмгеги нар көтөргүс. Ошол эле Айсулуу, Розалия Тилегенова өңдүү кыздар академияга билимин жогорулатуу максатында келишкен. Анткени спортто машыгууга билимди айкалыштырганда гана укмуштуу көрсөткүчтөр болору белгилүү. Демек, үлгү көрсөтүп жаткан спортчу кыздардын жетишкендиктерин көргөн өспүрүмдөрдө чоң ишеним пайда болуп, "биз дагы алар жеткен ийгиликти багындыра алабыз" деп ойлонуп калышты. Ошол эле учурда машыктыруучулар да шакирттерин биздин окуу жайга жиберип, тажрыйбасы бар педагогдордон билим алуусун сунуштап келишет", — деди Оморов.
Ошондой эле адис Универсиаданын программасына кыз-келиндер күрөшү кошулуп, студенттер арасындагы эл аралык мелдеште кыргызстандык жаш спортчулар да күчүн сынаганга мүмкүнчүлүк түзүлгөнүн кошумчалады.
