Адамдын организми 18 жашка чейин өсөт. Бул учурда жаш балдардын көрүүсү начарлап, кайра калыбына келип, өзгөрүп турушу мүмкүн. Ошондуктан лазердик коррекция өспүрүм толук жетилгенде жасалганынын себеби ушунда. Бул тууралуу Өмүрбек Жолдошев Sputnik Кыргызстан радиосунун эфиринде маек куруп жатып билдирди.
Жолдошев: күндүн нурун жетишерлик албаган баланын көрүүсү начарлайт
Анын айтымында, негизинен 18 жаштан кийин көздүн көрүүсү кандай абалда болсо, ошол боюнча сакталып, начарлабашы керек.
"Жаштар арасында көрүүнүн начарлашы Түштүк-Чыгыш Азияда акыркы жылдары күч алды. Мектеп окуучуларын ала турган болсок, бир класста 20 бала отурса, анын 18и көз айнек, линза колдонгон учурлар болуп жатат. Мунун себебин азыркыга чейин медицина так айта албайт. Ошентсе да санариптешүүнүн таасири, окууда ар кандай жабдууларды колдонуу көздүн функциясын бузууда. Генетиканын да таасири бар. Эгер ата-эненин көрүүсү начар болсо, анын баласында ушундай маселе болушу мүмкүн. Азыркы мезгилдин көйгөйү баланын кадимки эле тийген күндө аз жүрүүсү. Купкуу болуп, күн көрбөгөн балдар көп. Күндүн нурун жетиштүү албаган организмде серотонин гормону аз бөлүнүп чыгат да, бул көрүүнү начарлатат деген далил бар. Ошондуктан азыр Кытайдын мектептеринде күнүнө 45 минуттук бир сабагы сыртта өтөт. Анда 7-12 жаштагы окуучулар бактын көлөкөсүндө отуруп, күндөн энергия алып окушат", – деди Жолдошев.
Офтальмолог Кыргызстандын климатында көздү коргош үчүн ар бир адам кара көз айнек тагынып жүрүшү керектигин кошумчалады.
