БИШКЕК, 30-июл. — Sputnik. Ош шаарынын аймагында милициянын формасын кийип элди алдап жүргөн жигит кармалды. Маалыматты Ош шаардык ички иштер башкармалыгынын маалымат кызматы билдирди.
Маалым болгондой, 22-июлда саат 23:00 чамасында Ош шаарынын Раззаков көчөсүндө жайгашкан мейманкананын алдында белгисиз жаран шаардын 47 жаштагы тургунунун Samsung A51 үлгүсүндөгү уюлдук телефонун сурап алып, ал мейманканага кирип чыкканча качып кеткен.
Ош ШИИБдин Ак-Буура милиция бөлүмү тарабынан Кылмыш жана жоруктардын бирдиктүү реестрине Жазык кодексинин 204-беренеси ("Алдамчылык") менен катталып, сотко чейинки өндүрүшкө алынган. Учурда тергөө иштери жүрүп жатат. Шектүү милициянын формасын кийип, Оштогу жол тескөөчүлөргө дагы өзүн "милиция кызматкеримин" деп тааныштырып жүргөнү аныкталды.
