Мээ оорулары функционалдык жана органикалык болуп экиге бөлүнөт. Функционалдык бузулууда мээдеги нейрохимиялык өзгөрүүлөр болот. Буга психикалык оорулар кирет. Ал эми органикалык оорулардын себептери көп. Мисалы, кан тамыр ичкерип мээге кан жетпей калышы, инфекциялык дарттан, ар кандай жаракаттан улам келип чыккан оорулар. Бул тууралуу Улан Козубаев Sputnik Кыргызстан радиосунун эфиринде билдирди.
Козубаев: мээ картайбаш үчүн аны иштетип туруу керек
Анын айтымында, эгер адам башы менен урунганда бир секундадан бир нече секундага чейин эсин жоготсо бул мээ чайкалгандыктын белгиси.
"Мээ картая турган орган. Бирок аны картайтпаш үчүн жетиштүү азык келип турушу керек. Ошондуктан атеросклерозго жол бербөө зарыл. Майлуу, зыяндуу тамактарды жебей, башты ар кандай жаракат алып калуудан сактап, тамеки, ичимдик ичүүдөн алыс болсо эле мээнин морфологиялык түзүлүшү жакшы болот. Ал эми функционалдык абалы мыкты болуш үчүн анда көбүрөөк окуп, ар түрдүү интеллектуалдык тапшырмаларды аткарып, мындайча айтканда, мээни иштетип туруу керек. Ошондой эле баш менен катуу сүзүп алып көздөн от чагылышкан учурлар болот. Эгер бир секундадан бир нече секундага чейин адам эсин жоготсо бул мээ чайкалгандын белгиси. Мээге болгон мындай майда-барат сокку кийин эпилепсия, талма ооруларын чакырат. Эгер баш оору адамды кыйнаса анда дарыгерге кайрылуу зарыл", — деди Козубаев.
Дарыгер майып болуп калбаш үчүн тайыз сууга баш менен секирип түшүүдөн алыс болууга чакырды.
Подкасттын толук вариантын төмөнкү видеодон көрүңүз:
