Бишкектин мэринин милдетин аткарып жаткан Бактыбек Кудайбергенов эртең бишкектиктерди троллейбус, автобустар гана ташый турганын парламентте айтты.
Бул коомдук транспортко дагы 30 транспорт кошуларын билдирди.
Бишкек шаарынын милдетин аткарып жаткан Бактыбек Кудайбергенов маршруткалардын айдоочулары эртең дагы ишке чыкпай тургандыгын айтты.
"Азыр жүргүнчү ташуучу фирмалардын лицензиясынан ажыратуу боюнча эч нерсе айткан жокпуз, бирок аларга эскертүү бердик", — деген Кудайбергенов.
Бишкектеги аялдамалардын биринин бүгүнкү көрүнүшү. Элди азыр ташыган транспорттун негизгиси — троллейбус болууда.
Бишкек шаарынын мэринин милдетин аткаруучу Бактыбек Кудайбергенов коомдук транспорт боюнча жаралган көйгөйдөн улам шаардыктардан кечирим сурады. Бул тууралуу мэриянын маалымат кызматы кабарлады.
"Транспорт компаниялары менен бир эмес бир нече ирет жолугушууларды өткөрдүм. Жыйынтыгында бардык тарап бул маселени сүйлөшүү жолу менен чечүүгө даяр экенин айткан. Мен жол кире акысын шаардыктардын макулдугу жок өзүм эле көтөрүп кое албайм жана бул маселени жалгыз чече албайм. Коомдук транспорттун акысын эки тарапка тең ыңгайлуу коюп берүүнү колдойм. Бул маселе эч качан коркутуп-үркүтүү, ультиматум жолу менен чечилбейт", — деди Кудайбергенов.
Жеңил автоунаасы барлар Бишкектин аялдамаларында коомдук транспортту күтүп тургандарды ала кетүүнү улантып жатканын социалдык тармактан да байкоого болот. Алардын арасында позитивдүү маанайда жазылган посттор да бар.
Бишкек мэриясы маршрутканын айдоочулары иш таштоосун улантканына байланыштуу таксисттерге кайрылды.
"Урматтуу такси кызматынын ээлери, жетекчилери жана жүргүнчү ташуу менен жекече алектенген жарандар! Мэрия кызмат акыңарды жогорулатпоону өтүнөт", — деп айтылат маалыматта.
Муниципалитет шаар тургундары жумумушуна жана үйүнө бара албай кыйналып жатканын белгилеген.
ИИМ, "Манас" аэропорту жана "Дордой" ассоциациясы элди бекер ташуу үчүн 15 автобусту шаарга чыгарган.
Учурда эл ташууга муниципалдык 141 троллейбус жана 110 автобустар чыккан.
Бүгүн маршруткалардын айдоочулары эл ташыганга чыккан жок. Шаардыктар негизинен троллейбус, автобустар менен каттап жатышат. Андан сырткары жеңил автоунаа менен ишке бараткандар жолдон аялдамада тургандарды ала кетип жатышат.
Бишкекте элди ташууга абалга аралжы болсун деген максатта мэрия кечээ, 2-июнда троллейбустардын иштөө режимин саат 5:40тан 23:00гө чейин узартты. "Буга маршрутка айдоочуларынын иш таштаганы себеп болууда", — деп айтышты мэриядан.
