Ат арабанын үстүндө отурган болочоктогу белгилүү режиссер Искендер Рыскулов, актриса Зарема Мадемилова, колуна ымыркай кармаган Таттыбүбү Турсунбаева жана ат минип келе жаткан актер Бакирдин Алиевдин сүрөтү 1971-жылы Баткен облусунда тартылган.
Ал жылы белгилүү режиссер Төлөмүш Океев жазуучу Насирдин Байтемировдун "Тарых эстелиги" романынын негизинде "Отко таазим" аттуу тасма тарткан. Кинокартинада Кыргызстанда совет бийлигин орнотуудагы кыйынчылыктар, бай-манаптардын кулакка тартылышы, колхоздоштуруу жылдарындагы элдин турмушу, изги ою көрсөтүлгөн. Кинематографисттер ошол учурду эң алгачкылардан болуп айылдык советтин төрайымы болуп дайындалган Уркуя Салиеванын басып өткөн жолу, анын 24 жашында кылмышкерлердин колунан көз жумган тагдыры аркылуу ачып бергенге аракет кылган.
Эпизод калк жашабаган Баткендин алыскы эски кыштагында тартылган.
Аталган кинофильмдин жаралуусуна катышып калган КРдин эл артисти Чоро Думанаев ошол учурду мындайча эскерет:
"Төлөмүш байке каармандарды мыкты тандай билгендиктен аталган фильмде актердук ансамбль аябай күчтүү түзүлгөн. Алар менен иштешкеним менин чыгармачылыгыма да жакшы таасир эткен. Азыр көпчүлүгү бул дүйнөдөн өтүп кетиптир. Кинофильм негизинен Баткен жана Лейлек райондорунда тартылган. Ал жакта күн аябай ысып кетчү, Муратбек Рыскулов, Сабира Күмүшалиева, Алиман Жангорозова сыяктуу улуу адамдар Исфара деген шаарга кетип калышчу, жаштар болсо Баткенде эле жашачубуз. Сүрөттөгү Таттыбүбү Турсунбаева башкы каарман Уркуянын ролун аткарган, анын жолдошу Колдоштун образын Муратбек Рыскуловдун уулу Искендер жараткан эле. Экөө тең Ташкенттеги театралдык институтту чогуу бүтүп келип эл арасында бир топ эле таанылып калган учуру болчу. Актрисаны ал жакта күйөөсү Имаш байке коштоп жүрдү. Жубайлардын кичинекей балдары да кинокартинанын айрым эпизоддоруна тартылып калган", — деди Думанаев.
Кинофильм 1972-жылы толугу менен бүтүп, көрүүчүлөргө сунушталып, режиссер Төлөмүш Океевге Токтогул атындагы мамлекеттик сыйлык тапшырылган. Ошондой эле аталган тасмага Болот Бейшеналиев, Сүймөнкул Чокморов, Советбек Жумадылов, Жамал Сейдакматова, Жапар Садыков, Асанбек Кыдырназаров, Алымкул Алымбаев, Тургун Бердалиев, Насрет Дубашев, Чолпон Даанышманова, Аскар Сейдалиев, Деңизбек Чалапинов, Алмаз Кыргызбаев, Текен Чалапинов, Николай Толстых да катышкан.
