Акимова: кыялды ишке ашыруу үчүн бар каражатты коротпош керек
16:03 29.03.2021 (Жаңыртылды: 14:27 14.12.2021)
Жазылуу
Экономист Нургүл Акимова жарандар финансылык жактан сабаттуу болуу үчүн каржылык пландаштырууда оңой ишке ашыра турган кеңештерди берди.
Кайсы бир каалоону же кыялды ишке ашырууга акча чогултуу керек. Бирок аны ишке ашыруу үчүн топтолгон каражаттын баарын коротуу туура эмес. Бул тууралуу Нургүл Акимова Sputnik Кыргызстан радиосуна маек куруп жатып билдирди.
Акимова: кыялды ишке ашыруу үчүн бар каражатты коротпош керек
Анын айтымында, акча топтоо үчүн кандайдыр максат коюп алуу зарыл.
"Ишкерлик десе эле чоң бизнес деп ойлобош керек. Билгениңди сатсаң деле ишкерлик болуп саналат. Эң башкысы, туура максат кое билүү зарыл. Ал максаттын маанилүүлүгүн аныктап, ишке ашырууга мүмкүнбү, ушуну түшүнүп алуу шарт. Ал пайда алып келүүчү кыялбы же жөн эле көңүлгө жаккан нерсеби? Мисалы, өспүрүм унаа сатып алууну максат кылса, аны менен такси кызматына кирип акча табабы же жөн эле айдайбы, чечиш керек. Эгерде туруктуу кирешеси болбосо, анда алгач пассивдүү пайда келе тургандай жагдайды даярдап алуусу шарт. Качан гана туруктуу киреше алып келе турган жагдай түзүп алган соң каалоосун ишке ашырууну көздөсө туура болот. Ушул ойлорду анализдеп чыккандан кийин дагы эле унаа алгысы келсе, анда ал алгач рынокту изилдейт. Наркын аныктап алгандан кийин бюджетин эсептеп, ошого ылайык акча топтоого өтүш керек. Каражат чогултуп жатып аны башка нерсеге коротуп салбоо үчүн адам өзүндөгү дисциплинаны тарбиялашы зарыл. Эң негизгиси, бардык каражатты ошол кыялды ишке ашырууга жумшабай, кандайдыр бир тобокелчиликтердин алдын алуу зарыл", — деди Акимова.
Экономист акчаны коротуу үчүн ар дайым билим алып туруу зарыл экенин кошумчалады.
Подкасттын толук версиясын видеодон көрүңүз:
