БИШКЕК, 18-дек. — Sputnik. Ноокат районундагы айыл өкмөттөрдүн биринде бюджеттен бөлүнгөн каражатты уурдоо фактысы катталды. Бул туурасында Экономикалык кылмыштарга каршы күрөшүү кызматы (Финпол) билдирди.
Учурда бул иш боюнча Финпол сотко чейинки өндүрүш ачып, териштирип жатканы айтылат.
"Айыл өкмөттүн жооптуу адамдары курулуш материалдарын сатып алуу үчүн "Б.С." ЖЧКсы менен 1 миллион сомго жакын суммага келишим түзгөн. Андан кийин кызматтык абалынан кыянаттык менен пайдаланып, жалган кабыл алуу-өткөрүү актысын түзүшкөн. Натыйжада аталган каражатты компаниянын эсебине материалдарды иш жүзүндө албай туруп которушканы аныкталды", — деп айтылат маалыматта.
10 Бештин айы 2020, 16:46
Бул факт боюнча Финполдун Ош облусу боюнча тергөө башкармалыгы тарабынан Жазык кодексинин 320-беренеси ("Кызмат абалынан кыянаттык менен пайдалануу") менен кылмыш иши козголгон.
Учурда айыл өкмөттүн тийиштүү кызматкерлерин жоопко тартууга, ошондой эле мамлекеттин бюджетине келтирилген зыяндын ордун толтурууга багытталган иш-чаралар жүргүзүлүп жатат.
