БИШКЕК, 11-дек. — Sputnik. Бүгүн борбор калаада Айтиев атындагы Кыргыз улуттук көркөм сүрөт музейинде "Куттуу боз үй" деп аталган көргөзмө ачылат. Бул туурасында "Роза Отунбаеванын демилгеси" эл аралык коомдук фондунан кабарлашты.
"Сүрөтчү Алтынай Осмоева кыргыздын касиеттүү боз үйүнүн түзүлүшүнөн, каада-салт сактаган салттуу маанилеринен эргүү алып, жаратмандык көз карашын, заманбап искусство жана дизайн аркылуу коомчулукка тартуулайт. Сүрөтчүнү шыктандырган боз үйдүн көрктүүлүгү, түзүлүшү жана философиясы кийизден жасалган заманбап искусство объектилеринде көрсөтүлөт. Сүрөтчүнүн көрүүчүлөргө арнаган жаратмандык көз карашындагы чыгармачыл "Алачык" ,"Кут", "Бата" инсталляциялары кыргыз элибизге таандык каада-салттар жана инновациянын байланышын түшүндүрөт", - деп билдиришти аталган фонддон.
Көргөзмөнүн визуалдык катарын жарык жана үн орнотуулар, сүрөттөр, видеотасмалар толуктамакчы.
"Маданий каада-салттарды сактоо жана анын өнүгүшү, мурастарды чагылдырган заманбап искусствону өнүктүрүү, жалпы коомдун маданий агартуу маселелери талкууланат. Ошондой эле глобалдык өзгөрүүлөр доорундагы салттуу маданий баалуулуктардын жана кыргыз элинин каада-салт эрежелеринин нормалары бүгүнкү күндө зор мааниге ээ экендиги каралат", - деп айтылган маалыматта.
Көргөзмө Бишкектеги көркөм сүрөт музейинде эки жумага чукул болуп, андан кийин Ош, Нарын, Талас жана Ысык-Көл облустарындагы музейлерде уланмакчы.
