Кадырбеков: маданият тармагында каржы саясатын ирээттеш керек
Маданият тармагын өнүктүрүү үчүн Салык жана Бюджет кодекстерине өзгөртүүлөр киргизилиши керек. Бул тууралуу Нуржигит Кадырбеков Sputnik Кыргызстан радиосуна маек куруп жатып билдирди.
Анын айтымында, Салык кодексинин 208-беренесиндеги маданият тармагына демөөрчүлүк кылгандарга салык жагынан жеңилдик берилиши керек деген норма иштебей келет.
Министр Нуржигит Кадырбеков өкмөткө кинотеатрларды ачууну сунуштады
"1 064 китепкана, 800дөй клуб, 100гө чукул музыкалык, искусство мектептери, музейлер бар. Булардын 70-80 пайызынын акыбалы абдан начар. Авариялык абалдагылары дагы толтура. Мисалы, жакында эле Ала-Букадагы музыкалык мектепти жабууга туура келди. Анткени кичине бир табигый кырсык болсо, жарака пайда болуп кооптуулук жаралууда. Токтоболот Абдымомунов атындагы академиялык драмалык театрды оңдоп-түзөө үчүн 64 миллион, Чыңгыз Айтматов атындагы орус драмалык театрына 200 миллиондой каражат керек. Мына ушул маселелерди чечүү үчүн Салык кодексиндеги маданият тармагына демөөрчүлүк кылгандарга салыгынан жеңилдик берген норма иштесе, инвестиция тартуу менен бул тармактагы бир топ көйгөйлөр чечилмек. Андан тышкары, Бюджет кодексине өзгөрүү киргизилиши зарыл. Маданият тармагынан түшкөн киреше бюджетке которулуп, бул каражаттар кайра башка тармактарга жумшалып кетет. Атайын эсеп дегенди калыбына келтирбесе, маданият тармагынын мекемелеринин абалы начарлап жатат", — деди Кадырбеков.
Ошондой эле кыргыз маданиятына кызыккан туристтер деле кыйла каражат түшүрүп жатканын кошумчалады.
