Ал өкмөттүн социалдык тармактагы баракчасына жарыяланды. Жапаров биринчи кезекте коррупция менен криминалга каршы катуу күрөш жүргүзөрүн баса белгилеген.
Sputnik Кыргызстан анын кайрылуусундагы маанилүү учурларын тизмектейт:
- 2020-жылдын 4-октябрында тарыхый шайлоо өткөрүлүшү керек эле. Тилекке каршы, элдин үнү бийликке жетпес болду. Элдин тилеги, жаштарыбыздын үмүтү уурдалды;
- Бул жеңиш – жалпы Кыргызстан элинин ынтымагынын жеңиши. Эл биримдиги сакталып калды. Баарыбызды жеңишибиз менен чын дилимден куттуктайм;
- Мен саясатчыларга жана саясий партияларга кайрыларым:
- Бүгүн биз өлкөнү түндүк-түштүк, уруу-уруу, айыл-айыл же тууган-туушкан деп бөлбөй жашайлы;
- Менин башкы максатым – өлкөдө адилеттүүлүктү орнотуу, коррупция менен реалдуу күрөшүү;
- Мындан ары коррупция менен күрөшүү – саясий оппоненттердин көзүн тазалоонун инструменти болбойт. Саясий куугунтук дегенди менден ашык жон териси менен сезген саясатчы жоктур;
- Соттук өзүм билемдикке жана мыйзамсыздыкка чекит коюлат. Соттук реформалар мындан ары президенттик аппарат тарабынан эмес, коомчулуктун көзөмөлүндө жүргүзүлөт;
- 700 миллион долларды Кыргызстандан чыгарып кетүү боюнча шектелген Матраимовдор жана башка схемалуу коррупцияларды түзүп, элдин ырыскысына кол салган коррупционерлерди катаал жазага тартабыз;
- Кылмыш дүйнөсү өзүнүкүн диктовка кылганды токтотот деп кепилдик берем. Буга чейин айрым аймактарда бизнестин иштеши үчүн криминалдын уруксаты керек болчу. Бул мезгил артта калды! Ишкерлер менен инвесторлорго өзгөчө шарттар түзүлөт;
- Жакынкы жылдары өлкөбүздүн саясатын аныктай турган жаштар болот. Биз силер менен биргеликте кадр саясатын өзгөртөбүз;
- Президенттин жана өкмөттүн аппаратында катуу өзгөрүүлөр, оптималдаштыруулар болот;
- Биринчи кезекте пандемия маалында эл жакындарынан айрылып жатканда пайдасы тийбеген кредиттерге кайра текшерүү жүргүзөбүз;
- Биз мамлекеттин стратегиялык өнөктөштөрүнүн арасында алган кадыр-баркын туруктуу сактап калуунун жана аны өркүндөтүү боюнча иштерди жүргүзөбүз;
- Мен да силердин уулуңармын. Мен да карапайым үй-бүлөдөн чыккан баламын. Системаны толугу менен өзгөртөм. Ал үчүн мага колдоо керек! Эч качан жалгыз дарак токой болбойт. Дагы бир жолу элиме башымды ийип таазим этем!
