Сурабалдиева: ЖК отурумга чогулат, бирок топтошкондордун кысымын каалабайбыз

© Sputnik / Расул УсеналиевЖогорку Кеңештин жыйыны. Архив
Жогорку Кеңештин жыйыны. Архив - Sputnik Кыргызстан
Жазылуу
Эл өкүлүнүн айтымында, жыйын өтө турчу жер депутаттардын коопсуздугу үчүн ачыкталбайт. Бирок Facebook аккаунт аркылуу түз эфирден көрсөтүлөт.

БИШКЕК, 7-окт. — Sputnik. Парламент кезексиз жыйынга чогулат, бирок жолугушуу өтө турчу жер айтылбайт. Бул тууралуу Sputnik агенттигине Жогорку Кеңештин депутаты Эльвира Сурабалдиева билдирди.

Анын айтымында, жыйын өтө турчу жер депутаттардын коопсуздугу үчүн жарыяланбайт. Бирок Facebook аккаунт аркылуу түз эфирден көрсөтүлөт.

"Бул жашыруун жолугушуу эмес. Өтө турчу жерди ачыктабай турганыбыздын себеби топтошкон элдин кысымынан депутаттар өзүн коопсуз сезиши керек. Үч белгилүү партия, кайсы бир адамдар кырдаалдан пайдалануу менен башаламандык кылууну көздөп жатат. Биз мындайга жол бербейбиз. Президентке импичмент жарыяланышы керек", — деген парламент өкүлү.

Жогорку Кеңештин жаңы төрагасы шайланды

Ал кошумчалагандай, бүгүн башка партиялардын өкүлдөрү менен жолугушуу болуп, анда Тилек Токтогазиевдин талапкерлигин өкмөт башчылыкка көрсөтүү чечими кабыл алынган.

"Азыркы парламентсиз премьер-министрди бекитүү мүмкүн эмес. Эгерде кворум чогулбаса, калган депутаттарды таап, кол койдурганга аракет кылабыз", — деген Сурабалдиева.

Эскерте кетсек, бүгүн өкмөт үйүндө Элдик координациялык кеңештин жыйыны болуп өттү. Чечимдин долбоору даяр, ага кеңештин бардык өкүлдөрү чогулганда кол коюлмакчы.

Жаңылыктар түрмөгү
0