БИШКЕК, 7-окт. — Sputnik. Ак үй митингчилер тарабынан алынгандан кийин Бишкек милициясы эмне үчүн эки күн иштебей койгонун ички иштер министринин убактылуу милдетин аткаруучу жана Бишкек шаарынын коменданты Курсан Асанов Sputnik Кыргызстанга берген маегинде айтты.
Анын билдирүүсүнө караганда, милицияга жетекчилик толук кандуу көзөмөл кылган эмес.
"Ооба, милиция кызматкерлери эки күн иштеген жок. Анткени Жогорку Кеңеш, өкмөт иштебей калды. Анын үстүнө митингдер учурунда 60тай кызматкер жаракат алды. Чарчагандары үйүнө кетип, айтор, Бишкекте аз эле милиционер калган экен. Бул кадимки адамдык фактор", — деди Асанов.
Ошол учурда аны Коопсуздук кеңешинен Өмүрбек Суваналиев чакырып, шаарга комендант болуп, ИИМди убактылуу жетектеп берүүсүн суранганын кошумчалады.
"Ошондон тартып милдеттеримди аткарып, тартип орното баштадык. Өткөн түнү Бишкекте 2005, 2010-жылдардагы окуялар кайталанып кетпесин деп милиция жөнөкөй кийинип алып элдик кошуундарга кошулуп иштеп жүрүштү", — деди комендант.
Эске салсак, Бишкектеги митингдин эртеси күнү милиция ишке чыккан эмес. Ошол күнү ички иштер министри кызматын убактылуу аткарып жаткан Курсан Асанов мекеменин башкы аппаратынын, Бишкек шаардык жана Чүй облустук ИИББдин жетекчилеринин катышуусунда ыкчам жыйын өткөргөн. Ал эми 7-октябрь күнү эртең менен ал Бишкек милициясына коомдук коопсуздукту камсыз кылуу боюнча инструктаж жыйын өткөрдү. Учурда милиция штаттык режимде иштеп жатат. Бүгүн түнү кадимкидей көчөдөгү тартипти көзөмөл кылмакчы.
