БИШКЕК, 5-окт. — Sputnik. Митингди таратуу учурунда жабыркагандардын саны 122ге жетти. Анын кыркы милиция кызматкерлери болсо, бирөө медик. Бул тууралуу Саламаттык сактоо министрлигинин маалымат кызматы кабарлады.
Ага ылайык, саат 00:00гө карата Травматология жана ортопедия илим-изилдөө борборуна ар кандай жараат менен 65 адам келип түшкөн.
"Анын кыркы күч түзүмдөрүнүн өкүлдөрү. Экөөнүн колу-буту сынып реанимация бөлүмүнө жаткырылган. Дарыгерлер алардын абалы оор деп баалашууда. Улуттук госпиталга 40 адам кайрылса, анын экөө башынан жаракат алып реанимацияга түшкөн", — деп айтылат маалыматта.
№1 шаардык клиникасына эки адам кайрылган. Ал эми Чүй облустук ооруканасына ар кандай жараат менен жети адам түшкөн. Аларга биринчи медициналык жардам көрсөтүлгөндөн кийин үйдөн дарыланууга кетишкен.
Митингчилер коргонуш үчүн таштанды челектерди өрттөшкөн. Аянтта тартылган видео
Улуттук хирургия борборуна жети адам кайрылып, анын бирөө кайра үйүнө жиберилген.
Саламаттык сактоо министрлиги каза болгон учур катталбаганын кошумчалады.
Тез жардам кызматынын фельдшерине да кол салуу болуп, ал Травматология жана ортопедия илим-изилдөө борборуна түшкөнү айтылды.
