БИШКЕК, 23-сен. — Sputnik. Премьер-министр Кубатбек Боронов брифингде сүйлөп жатып аймактарда коронавирус жуктургандардын саны кайра көбөйүп, кооптуулук жаралганын билдирди.
Анын айтымында, өткөн жумада өлкөдө жаңы катталган учурлар 47ден 91ге жеткен. Аймактар боюнча караганда Баткенде абал начар, Ысык-Көлдө жана Жалал-Абадда ооруга чалдыккандар көбүрөөк болууда.
"Башка аймактарда да көбөйүү коркунучу бар, себеби бүгүн өкмөт жана тиешелүү мамлекеттик органдардын аракетине карабастан санитардык нормаларды сактабай калдык. Баягы оор күндөр эстен чыкты. Той-ашты кайра баштадык, көчөдө, коомдук транспортто бет кап тагынууну унуттук. Оору күчөгөн маалда 10-15 күн 10 адамдын тогузу бет кап тагынып жүргөн, андан кийин кайра эле эски адатыбызга түштүк. Урматтуу мекендештер, кыйын күндөрдү эстен чыгарбайлы, андай кайра кайталанбасын", — деди Боронов.
Ошону менен катар өкмөт башчы алыскы жана жакынкы өлкөлөрдөгү абал түйшөлтүп жатканын эскертти.
Баткенде санитардык талаптарды аткарбагандарга айып салынды. Арасында 9 мамкызматкер бар
Мындан улам ал элге кайрылып, санитардык эрежени сактап, тиешелүү жерде бет кап тагынып жүрүүнү суранды. Ал эми өкмөт бардык даярдыкты көрүп, убагында чара көрүү боюнча иштеп жатканын белгиледи.
