БИШКЕК, 2-сен. — Sputnik. Мурда COVID-19 кары жана өнөкөт оорулары бар адамдарга кооптуу деген түшүнүк болсо, эми балдар арасында дагы оор формада өтөрү жөнүндө маалыматтар түшө баштады. Бул тууралуу саламаттык сактоо министринин орун басары Бакыт Жангазиев Кавасаки синдромун аныктоо жана дарылоо боюнча протоколду иштеп чыгуу үчүн түзүлгөн жумушчу топтун жыйынында айтты.
Белгилей кетсек, өткөн аптада Саламаттык сактоо министрлигинин буйругу менен балдар арасындагы коронавирустан улам пайда болгон мультисистемдик сезгенүү синдрому боюнча протокол иштеп чыгуу тапшырмасы коюлуп, эксперттик жумушчу топ түзүлгөн.
Эксперттик топко педиатрлар, гематологдор, кардиологдор, кардио-ревматологдор, ревматологдор жана реаниматологдор кирген.
“Мурда COVID-19 кары жана өнөкөт оорулары бар адамдарга кооптуу деген түшүнүк болсо, эми балдар арасында дагы оор формада өтөрү жөнүндө маалыматтар түшө баштады. Андыктан коронавирустан улам козголгон Кавасаки илдети тууралуу өзүнчө документ даярдап, дарыгерлерге беришибиз керек”, — деди Жангазиев.
Августта 1 120 балага COVID жуккан. Бейтаптарды кабыл алчу ооруканалардын тизмеси
Ошондой эле документ бир гана Кавасаки илдети менен чектелбей, күз-кыш айларында боло турган бардык оорулар тууралуу маалымат толук камтылары айтылды.
Министрликтин маалыматына караганда, дүйнөдө COVID-19 жуктургандардын 10 пайызы балдар. Алардын ичинен 2 пайызыныкы клиникалык жактан тастыкталган. Вирус жугузуп алган ымыркайлардын бир пайызынын оорусу оор формада өтүүдө.
