БИШКЕК, 19-авг. — Sputnik. Күз-кыштагы эпидемиялык мезгилге даярдык көрүү максатында Кыргызстанда тендер өткөрүлүп, тумоого каршы 135 миңден ашуун вакцина жеткирүү боюнча келишим түзүлдү. Мындан тышкары, тобокелдик топтору үчүн дагы 700 миң доза гриппке каршы вакцина алуу үчүн кошумча өтүнмө даярдалды. Бул тууралуу Республикалык штаб кабарлады.
Буга чейин премьер-министр Кубатбек Боронов гриппке каршы дарыларга буюртма берилгенин, күзүндө дарылоо иштери башталарын айткан.
"COVID-19 менен катар башка вирустук инфекциялардын жана сасык тумоонун жайылышын алдын алуу максатында Саламаттык сактоо министрлиги тобокелдик тобун аныктап, гриппке жана пневмококко каршы вакциналарга болгон муктаждыкты эсептеп чыкты", — деп айтылат маалыматта.
Грипп менен ооругандар суукта көбөйүп, мындай көрүнүш март айына чейин созулат. Буга грипп вирусунун суукка туруктуулугу жана гипотермия учурунда адам организминин коргонуу деңгээли төмөн болушу өбөлгө түзөт.
Алдыдагы эпидемиялык мезгилде сасык тумоонун этиологиялык түзүлүшүн жана жаңы түрлөрүн аныктоо, ошондой эле башка курч респиратордук вирустук инфекцияларды диагноздоо үчүн 1000 даана изилдөөгө реагент жана тест-системаларын сатып алууга өтүнмө берилген.
COVID-19: Россияда массалык вакцинация качан башталары айтылды
Сасык тумоого каршы эмдөө сентябрдын аягында башталат. Анын так күнү дарылардын келишинен көз каранды.
Биринчи кезекте эмдөөдөн тобокел тобуна кирген медициналык кызматкерлер, өпкөнүн, жүрөктүн, боордун, бөйрөктүн өнөкөт оорулары бар жарандар, көп ооруган балдар, балдар үйлөрүнүн жана интернат-мектептердин тарбиялануучулары, кош бойлуу аялдар, диабет менен ооруган жана 65 жаштан ашкан карылар өткөрүлөт.
Премьер-министр Боронов буга чейин калктын социалдык аялуу катмары гриппке каршы акысыз эмделерин билдирген.
