БИШКЕК, 25-июл. — Sputnik. Кызым Бактыгүл Жээнбекова күйөө балам менен пандемия башталгандан бери, апрелден тарта эле муктаждарга, дарыгерлерге тамак-аш, дары-дармек таратып, колунан келген жардамын берип келе жатат. Бул тууралуу өлкө башчы Сооронбай Жээнбеков "Биринчи радиого" маек берип жатып айтканын президенттин маалымат кызматы билдирди.
Өлкө башчыга "жакында эле медицина факультетин бүткөн президенттин кызы эмнеге эл катары оорулууларды дарылабайт" деген талкуулар болду. Сиздин үй-бүлөңүз тууралуу дээрлик маалымат жок экен. Жакындарыңыз элге жардам берип жатабы?" деген суроо берилген.
Жээнбеков кызы медик эмес экенин айтып, учурда балдары менен үйдө экенин белгилеген.
"Кызым боюнча тактоо киргизип коеюн. Ал Славян университетинин финансы факультетин бүтүргөн. Кудайга шүгүр, жакында эле экинчи уулдуу болуп, азыр балдары менен үйдө. "Чыккан кыз чийден тышкары" дегендей, өз үй-бүлөсү менен алек. Күйөө балам экөө пандемия башталгандан бери, апрелден тарта муктаждарга, дарыгерлерге тамак-аш, дары-дармек таратып, колунан келген жардамын берип жатыптыр. Кыз бала ата-энеге өзгөчө күйүмдүү болот экен. Айрыкча мага абдан күйөт, терс таасирин тийгизип албайын деп өзүн көп нерседен чектейт. Кайрымдуулук иштерин деле тынч жасап жатат, аны токтотпойт деп ойлойм", — деп жооп берген президент.
Жээнбеков: Кыргызстанда 30-июль Жалпы улуттук аза күтүү күнү болот
Ал жубайы дагы кайрымдуулук иштери менен көптөн бери алектенип келе жатканын кошумчалаган.
"Жубайым көп жылдан бери эле мүмкүнчүлүккө жараша кайрымдуулук ишин жасап келет. Бирок кайда, кимге берет, алган кишилер дагы жардамды жубайым берип жатканын билбейт. Баягы "оң колуң бергенди сол колуң билбесин" деген принцип менен иштеп келе жатат. Азыр деле үй-бүлөбүздүн мүмкүнчүлүгүнө жараша ошол кайрымдуулук иштерди улантат", — деген өлкө башчы.
Белгилей кетсек, өлкө башчынын бир уул, бир кызы бар.
