Сабиров: базар экономикасында бааны атаандаштык жөнгө салат
Социалдык маанилүү товарлардын наркын мамлекеттик жөнгө салууга мерчемделген 90 күн убакыт өттү. Айрым товарларга баа бир аз кымбаттаган учурлар кездешүүдө. Эгерде алардын наркы кескин түрдө көтөрүлүп, 20 пайызга өссө, мамлекеттик жөнгө салуу ишке кирет. Бул тууралуу Шухрат Сабиров Sputnik Кыргызстан радиосуна маек берип жатып билдирди.
Анын айтымында, 13-мартта социалдык маанилүү товарларды жөнгө салуу боюнча токтом чыккан.
Күзгө даярдык. Алмазбек Баатырбеков азык-түлүк коопсуздугун ортого салды
"Өлкөнүн экономикасы базар шартына ылайыкташкан. Натыйжада баа атаандаштыктын негизинде жөнгө салынат. Бирок 2009-жылы өлкөдө социалдык маанидеги товарлардын тизмеси боюнча токтом кабыл алынып, ага 14 товар киргизилген. Ал эми ушул жылдын апрель айында ал тизмеге дагы 11 товар кошулуп, жалпы 25ке жетти. 13-марттан тарта өкмөттүн токтомуна ылайык, Монополияга каршы жөнгө салуу мамлекеттик агенттиги социалдык маанидеги товарларга жогорку чектеги бааны коюп бергенбиз. Андан жогорулаткандарды Финансы полициясы менен биргеликте атайын рейддер менен аныктап турдук. Бирок жөнгө салууга мерчемделген 90 күн убакыт өтүп кетти. Азыр айрым товарларга баа бир аз кымбаттаган учурлар кездешүүдө. Эгерде социалдык маанилүү товардын баасы кескин көтөрүлүп, 20 пайызга өссө, мамлекеттик жөнгө салуу ишке кирет. Эгерде баалардын кескин көтөрүлгөнү байкалса, жарандар монополияга каршы агенттигинин бөлүмдөрүнө билдирип койсо болот", — деди Сабиров.
Ошондой эле ал бааларды көзөмөл кылууда ишкерлердин дагы чыгашаларды жаап, пайда алуусун эске алуу зарыл экендигин кошумчалады.
