Акматова: коронавирус учурунда башка бейтаптарды дарылоо токтогон жок
Коронавирус жана анын натыйжасында пайда болгон ооруканадан сырткаркы пневмония илдетине чалдыккандар акысыз дарыланышат. Бирок айрым дары-дармектердин тартыштыгы жаралып, бейтаптар аларды сатып алууга мажбур болушту. Бул тууралуу Айнура Акматова Sputnik Кыргызстан радиосуна маек берип жатып билдирди.
Анын айтымында, өкмөт, Республикалык штаб тарабынан тийиштүү дары-дармектердин запасын, керектүү жабдыктарды камсыздоо тапшырмасы коюлган.
Коронавирус, пневмонияга кабылгандардын дарысы да акысыз болобу? Расмий жооп
"Коронавирустан башка ооруга чалдыккандарды дарылоо токтоп калган жок. Мурдагыдай эле жол кырсыктары катталып, өнөкөт оорулар, ар кандай илдеттер менен ооруканага кайрылышууда. Мунун баары бекер дарыланууда. Анткени баары бекер дарыланат деген берене Конституцияда бар. Тилекке каршы, айрым дары-дармектердин таңсыктыгы жаралды. Аларды бейтаптар өздөрү сатып алышууда. Албетте, коронавирус, пневмония илдетине чалдыккандар дагы акысыз медициналык жардам алышууда. Бирок оору күчөп кеткендигине, алып сатарлар кызыл кулактык кылганына байланыштуу сегиз позициядагы дарылардын тартыштыгы жаралды. Муну баарыбыз көрүп-билип турдук. Бул багытта Дары-дармек департаменти, фармкомпаниялар менен биргеликте тийиштүү маселелер коюлуп жатты", — деди Акматова.
Ошондой эле ал фармкомпаниялар дары-дармекке болгон муктаждык курч болгондуктан заводдор чыгарууга жетишпей, өлкөгө жетиштүү дары-дармектер алып келинбей жатканын белгилегенин кошумчалады.
