БИШКЕК, 18-июл. — Sputnik. Бишкектеги күндүзгү жана түнкү стационарлар күчөтүлгөн режимде иштеп, ал жайларга бир суткада 5000дей адам кайрылды. Бул тууралуу мэриянын маалымат кызматынан кабарлашты.
"18-июлга карата күндүзгү стационарлар 45 миң 403 адамды кабыл алды. Алардын ичинен 32 миң 722 жаранга асма укол салынса, 12 миң 425 бейтап дарыгерлерден кеп-кеңеш алып, 246сы ооруканага жаткырылды. Ал эми түнкү стационарлар төрт күндө 1759 бейтапка жардам берип, ону ооруканага жиберилген. Бактыга жараша өткөн сутка тынч өтүп, уюштурулган жайларда кайтыш болгондор катталган жок", — деп жазылган маалыматта.
Ал жерде учурда иштеп жаткан медицина кызматкерлери, ыктыярчылар тамак-аш, жатакана, жеке коргонуучу каражаттары менен камсыздалган.
Өкмөт стационарларга тажрыйбалуу медиктерди тартуу ишин күчөтөт
Ошондой эле шаардык муниципалитеттен күндүзгү стационарларга ишкерлердин жардамы менен 151 кычкылтек концентратор, 23 дарыкана, түнкүсүн иштей турган жайларга 51 кычкылтек концентратор, беш дарыкана коюлгандыгын кошумчалады.
Андан сырткары, мэриядан өзүн жаман сезген калаа тургундарды үйдө жата бербей, ал стационарларга кайрылууну сунуштайт.
Өлкө аймагындагы соңку кабарлар менен биздин Telegram-каналдан таанышып туруңуз.
