Жогорку Кеңештеги коммунисттер партиясынын жалгыз өкүлү, "Өнүгүү — Прогресс" фракциясынан депутат болуп келген Исхак Масалиевдин отставкага кетер алдында Дастан Жумабековдун дарегине айткан сын-пикирин төрага анын жеке көз карашы катары баалай турганын билдирди. Негизгиси эл өкүлү төраганы коррупцияга күнөөлөбөгөнүн айтып, Жумабеков Sputnik Кыргызстан агенттигине кенен маек курган.
"2017-жылы төрагалыкка талапкер болгонумда, ал оппонентим болчу. Бирок көпчүлүк добуш менен мен өтүп кеттим. Исхак Апсаматович ошондон бери менин ар бир сөзүмдү көзөмөлгө алам деп аракет кылып жүргөн окшойт деп ойлоп калдым. Бүгүн эстеп жатам да, ага чейин биз бири-бирибизди мыйзамдарда колдоп, абдан жакшы, сый мамиледе болчубуз", — деди Жумабеков.
Кошумчалай кетсек, 21-майда парламент жыйынында Исхак Масалиев мандатын тапшырарын жар салган. Өзүнүн туулган күнүндө атайын сөз алып сүйлөгөн депутат 25-майдан баштап парламенттин мындай курамы менен мындан ары иштеше албай турганын билдирген.
