Айдоочулардын жолдо жанын кашайткан учурлардын бири — эч нерсеге карабай экинчи катардан кайрылып кеткендер. Айрымдары муну эрежени эске албай атайын эле кылса, кээ бири жол эрежесин чындап эле билбейт. Экинчи катардан кайсы учурда, автоунаанын кайсы түрлөрү бурулса болорун инспекторлордон сурап билдик.
Эреже боюнча экинчи катардан кантип кайрылыш керек?
Жолдогу кесилиште оңго же солго бурулардан мурда айдоочу алдын ала четки катардан орун алып калышы керек. Жолдун так кесилишине келгенде четке чыкпай, ага чейин жол чийинди карап ошого багыт алганы дурус. Анткени кесилишке келгенде башка унаалар четке оңой менен кое бербейт.
Башкача айтканда, жолдун кесилишине жетейин деп калганда айдоочу жол белгисин же жолдогу чийинди карашы керек. Кыймыл көп трассалардын айрым жерлеринде жол белгилери автоунааларга экинчи сызыктан кайрылып кетүүгө уруксат берет. Эгер белги жок болсо, айдоочу бурула турчу тарапты ыктап, четке чыгып алуусу кажет.
Экинчи катардан кайсы учурда кайрылса болот?
Жогоруда айткандай, чоң шаарларда, кыймыл көп трассаларда жол белгилери жана жол чийиндери экинчи сызыктан кайрылууга уруксат берет. Анын баары белги, жол чырак аркылуу көрсөтүлүп турат. Алсак, сиз Чүй проспекти менен батыштан чыгышты көздөй бара жатасыз. Чүй менен Фучик проспектилеринин кесилишине келгенде, солго экинчи катардан бурула берсе болот. Башкача айтканда, бул жерден түз дагы, бурулуп да кете аласыз. Себеби жол белгисинде ошондой деп көрсөтүлгөн.
Экинчи катардан бурулуп кеткендерди кандай айып пул күтөт?
Жол белгилерин жана жол чийинде көрсөтүлгөн талаптарды аткарбаган айдоочуларга 1000 сом өлчөмүндө айып пул салынат. Эгер эреже бузуудан бирөө-жарым жапа чегип калса же кырсык болуп кетсе, айып пулдун наркы эки эсеге көбөйөт.
