БИШКЕК, 23-май — Sputnik. Ысык-Көл облусунда прокурордун жардамчысы ири өлчөмдө пара алып жатып кармалды. Бул тууралуу Улуттук коопсуздук мамлекеттик комитетинен билдиришти.
Маалыматка ылайык, 22-май күнү УКМКнын Коррупцияга каршы күрөшүү кызматы Башкы прокуратуранын Өздүк коопсуздук жана кызматтык териштирүү бөлүмү менен биргеликте ыкчам издөө иштерин жүргүзүп, Жети-Өгүз районунун прокурорунун жардамчысы 38 жаштагы К.А. аттуу кызматкерди 150 миң сом пара алып жатканда колго түшүргөн.
"Прокурордун ага жардамчысы арыздануучунун уулуна карата козголгон кылмыш иши боюнча жеңилдетилген чечим чыгаруу үчүн андан 2000 АКШ долларын талап кылган", — деп УКМКдан билдиришти.
Аталган факт боюнча сотко чейинки өндүрүштүк материалдар чогултулуп, Кылмыш-жаза кодексинин 326-беренесинин 2-бөлүмүнүн ("Пара талап кылуу") негизинде Кылмыш жана жоруктардын бирдиктүү реестрине катталды. Шектүү УКМК убактылуу кармоочу жайына киргизилди.
Учурда тергөө иштери улантылып жатат.
