БИШКЕК, 19-май — Sputnik. Кытай жакынкы күндөрдө коронавирустан жапа чеккен өлкөлөр үчүн эки миллиард доллар бөлө турган болду. Бул туурасында Reuters Кытай жетекчиси Си Цзиньпиндин Дүйнөлүк саламаттыкты сактоо уюмунун ассамблеясында сүйлөгөн сөзүнө таянып кабарлады.
Анын айтымына караганда, акча өнүгүп келе жаткан мамлекеттерге берилет.
"COVID-19 менен эл аралык күрөшкө түрткү берүү үчүн Кытай эки жыл ичинде жапа чеккен мамлекеттерге жардам жана социалдык-экономикалык өнүгүүсүнө 2 миллиард доллар берет. Бул негизинен өнүгүп келе жаткан өлкөлөргө каралат", — деген Кытай лидери ДССУнун видеоконференция түрүндө өткөн 73-жыйында.
Ал муну менен кошо эле Кытай бардык өлкөлөргө пандемия боюнча ачык маалымат берүү маанилүү экендигин айтты.
"Кытай ар дайым ачык болуп, жашырбай, жоопкерчиликтүү болуп келди. Коронавирус жана башка эпидемиологиялык кырдаал туурасында ДССУга өз учурунда маалымдады", — деген ал.
БУУ менен кызматташууда Кытайдын аймагында эпидемияга каршы күрөшүү каражаттарына муктаж болгон мамлекеттерге берүү үчүн глобалдуу кампа уюштурулат. Ал эми аталган каражаттарды жеткирүүгө атайын мүмкүнчүлүктөр каралат.
