БИШКЕК, 18-май — Sputnik. Бишкекте көчөлөрдүн кесилишинде сүзүшкөн автоунаалардын бири тосмого барып урунду.
Окуя болгон учур күбөнүн автосундагы видеокөзөмөлгө түшүп калган. Кадрлар "Короче" Telegram-каналына жүктөлдү.
Видеодо көрүнүп тургандай, Абдрахманов көчөсү менен Чүй проспектисинин кесилишинде автоунаа башка машина менен кагышат дагы, айдоочу рулду башкара албай, жол жээгиндеги тосмо менен жол чыракка барып урунат.
Бишкек шаардык кайгуул милиция кызматынын башкармалыгынан билдиришкендей, тосмого Honda Odissey үлгүсүндөгү авто барып урунган. Жол кырсыгынын экинчи катышуучусу Toyota Avensis автоунаасы. Жерине Тез жардам кызматы келген, бирок жабырлануучулар олуттуу жаракаты болбогон соң ооруканага баруудан баш тартышкан. Машиналар айып короого киргизилди.
