БИШКЕК, 18-май — Sputnik. Борбор калаада болгон бүгүнкү соттук отурумга айыпталуучу, мурдагы президент Алмазбек Атамбаев алып келинбегендиктен, сот жараяны 25-майга жылдырылды. Бул туурасында Биринчи Май райондук сотунан билдиришти.
"Сотко Атамбаевден саламаттыгына байланыштуу отурумду анын катышуусуз өткөрүү жөнүндө арыз келип түштү. Андан сырткары, айыпталуучу Мээрбек Мискенбаевдин жактоочулары Рамазанова менен Бараков келишкен жок", — деп айтылат маалыматта.
Атамбаевдин, андан сырткары, жактоочулар Рамазанова, Бараковдордун келбегендигине байланыштуу, териштирүү 2020-жылдын 25-май күнүнө саат 10:00гө жылдырылгандыгын айтышты.
Ал эми Улуттук коопсуздук боюнча мамлекеттик комитет билдирүү таратып, Алмазбек Атамбаевдин абалы жакшы деп баалаанып жатканын, эч кандай дооматы жок экенин билдирди.
Кой-Таш окуясы
Алмазбек Атамбаев 2019-жылы 7-8-августтагы Кой-Таш окуяларынан соң камакка алынган. Учурда Атамбаев сегиз эпизод менен шектелип, УКМКнын тергөө абагында. Бул окуядан бир киши каза таап, 175 адамдын дарыгерлерге кайрылганы белгилүү болгон.
