БИШКЕК, 8-май – Sputnik. Улуу Жеңиштин 75 жылдыгына карата “Россия сегодня” эл аралык маалымат агенттигинин имаратынын медиафасадына Жеңиш параддарынын сүрөт хроникасы коюлат.
Агенттик Москва шаарындагы Зубовский бульварында жайгашкан.
“Параддык хроникада” “Россия сегодня” агенттигинин фото архивинде сакталган 20дан ашык сүрөт камтылган. Анда өлкөнүн негизги майрамы чагылдырылат.
Видеонун хронологиясы 1945-жылдан 2015-жылга чейинки Жеңиш параддарында тартылган тандалма сүрөттөр менен түзүлгөн.
“Парад хроникасынын” авторлорунун арасында таланттуу фотожурналисттер бар. Мисалы, фронттогу легендарлуу корреспонденттер Макс Альперт менен Давид Шоломович, Россиянын биринчи президентинин жеке сүрөтчүсү Дмитрий Донской, ХХ кылымдагы саясий лидерлердин портретисти Юрий Абрамочкин, World Press Photo сыйлыгынын көп жолку ээлери Сергей Гунеев менен Владимир Вяткин жана башкалардын эмгектери камтылган.
Жеңиш парадынын фотохроникасынын видеосу РИА Новости агенттигинин Facebook, Twitter, ВКонтакте, Одноклассники жана Youtube баракчаларында дагы жеткиликтүү.
Коронавирус пандемиясынан улам жарыяланган карантинге байланыштуу Жеңиш парады уюштурулбай калганы менен “Параддык хроникадан” 9-Май майрамын үйдөн чыкпастан эскерсеңиздер болот.
“Россия сегодня” агенттиги — бул эл аралык медиагруппа. Анын миссиясы — дүйнөдө болуп жаткан орчундуу окуяларды ыкчам чагылдыруу жана аудиторияны негизги маселелер боюнча адистердин пикири менен тааныштыруу.
“Россия сегодня” өзүнө РИА Новости, РИА Новости Спорт, РИА Новости кыймылсыз мүлк, Прайм, РИА Рейтинг, ИноСМИ, Социалдык навигатор сыяктуу бир катар маалымат агенттиктерди камтыйт.
Ал эми чет өлкөдө медиагруппа Sputnik эл аралык маалымат агенттиги жана радиосу катары таанымал.
