БИШКЕК, 6-май — Sputnik. Премьер-министр Мухаммедкалый Абылгазиев өкмөттүн Ысык-Көл облусундагы өкүлү Акылбек Осмоналиевге чечимди макулдашпастан кабыл алганы үчүн эскертүү берди. Бул тууралуу өкмөттүн маалымат кызматы кабарлады.
Буга чейин Ысык-Көл облусунун ыкчам штабынын чечими менен облуска кирүүгө тыюу салынган болчу. Мындан сырткары аталган аймакка кирерде жарандардан коронавирус инфекциясынын бар-жогун аныктоо боюнча тесттен өткөндүгү жөнүндө маалым кат талап кылынган.
"Бул чечимдер Республикалык ыкчам штабдын сунуштамаларына жана Саламаттык сактоо министрлиги тарабынан бекитилген иш-аракеттердин алгоритмине дал келбейт. Тийиштүү алгоритмде каралган учурларды эске албаганда, жарандардан облуска, шаарга, районго жана башка калктуу конуштарга киргенде COVID-19 жок экендиги тууралуу маалымдама талап кылуу туура эмес", — деп айтылат маалыматта.
Эске салсак, Ысык-Көл облусунда коронавирус жуктуруп алган 10 бейтаптын баары тең айыгып чыкты.
