БИШКЕК, 3-май — Sputnik. Коронавирус инфекциясынын кесепетинен №3 үй-бүлөлүк дарыгерлер тобунун жетекчиси Жүзүмкан Көкүмбаева 58 жаш курагында мезгилсиз дүйнөдөн кайтты. Бул туурасында Саламаттык сактоо министрлиги тараткан некрологдо жазылат.
Ал илдет жуктуруп алып дарыланып жаткан, тилекке каршы, 2-май күнү ооруканада үзүлгөн.
"Камкор эне, сүйүктүү жубай Жүзүмкан Асановна ак ниет, чынчыл кызматкер, өз кесибине берилген чыныгы дарыгер. Ал өлкөсүнүн алдындагы жарандык парзын аткарып кетти", — деп эскерет медиктер.
Көкүмбаева 1962-жылы Нарын облусунун Кочкор районуна караштуу Улахол айылында туулган. Кыргыз мамлекеттик медициналык институтун аяктагандан кийин эмгек жолун Бишкектеги №5 үй-бүлөлүк медицина борборунан баштаган. Андан кийин №3 бейтапканага которулуп иштеп жаткан.
Жүзүмкан Көкүмбаева өз кесибинин мыктысы, жаш кесиптештеринин насаатчысы, бир нече дарыгерлерди тарбиялап чыгарган, бейтаптардын жана кесиптештеринин сый-урматына татыган кадыр-баркы жогору дарыгер болгон.
Анын жаркын элеси кесиптештеринин, жакындарынын жана досторунун жүрөгүндө түбөлүк сакталып кала берет.
Саламаттык сактоо министри жана министрликтин атынан туугандарына жана жакындарына терең кайгыруу менен көңүл айтабыз.
