БИШКЕК, 3-май — Sputnik. Испаниянын жашоочулары марттын ортосунда коронавируска байланыштуу чектөөлөр киргизилгенден бери биринчи жолу таза абага чыгып сейилдеп, машыгууларын жандантышты. Бул тууралуу РИА Новости жазды.
Элдин топтолушуна жол бербөө максатында бийлик расписание менен бир катар эрежелерди иштеп чыккан. Ага ылайык, 14 жаштан жогоркулар саат 06.00дөн 10.00гө чейин жана 20.00дөн 23.00гө чейин сейилдеп, спорттун жеке түрлөрү менен машыга алышат. Бирок өзүң менен чогуу жашаган бир адам менен үйдөн бир чакырымга чейин сейилдегенге уруксат. Ошол эле учурда кечке эшикке чыга бергенге болбойт.
Бүгүнкү күндө Барселонада парктар эл үчүн эшигин ачкан. Мадридде сейил бактар жабык болгону менен тургундар сыртында эс алып жүрөт. Мындан сырткары өз аймактарында багбанчылык кылууга уруксат берилген. Жогорудагы эрежелердин сакталышын полиция көзөмөлдөйт. Беш миңден аз кишиси бар аймактарда сейилдөөгө чектөө киргизилген эмес.
COVID-19 диагнозу коюлган адамдар же карантиндегилер үйдө болууга милдеттүү экендиги белгиленди. Ошондой эле карылар үйүндө жашагандар сейилдей албайт.
Испания коронавирус пандемиясынан эң көп жабыркаган өлкөлөрдүн бири. Тагыраагы, жарандары оорудан каза тапкандардын саны боюнча төртүнчүдө (АКШ, Италия жана Улуу Британиядан кийин), жуктургандар боюнча (АКШдан кийин) экинчи орунда турат.
Испанияда өзгөчө режим 14-мартта киргизилип, кийинчерээк 9-майга чейин узартылган. 28-апрелде бийлик карантинден акырындап чыгуунун планын бекиткен.
