БИШКЕК, 1-май — Sputnik. Айрым мамлекеттик органдар, мекемелер жана жергиликтүү өз алдынча башкаруу органдары бул жумада дем алышсыз иштейт. Алар үчүн 2-3-4-май иш күн экендигин өкмөттүн маалымат кызматы билдирди.
Тиешелүү буйрукка премьер-министр Мухаммедкалый Абылгазиев кол койгон.
Документте көрсөтүлгөн мамлекеттик органдардын, мекемелердин жана жергиликтүү өз алдынча башкаруу органдарынын жетекчилерине ишке чыга турчу кызматкерлердин тизмесин аныктоо тапшырмасы берилген.
Ал эми бюджеттик мекемелерди тейлеген коммерциялык банктарга 2-3-4-май күндөрү эмгектене тургандарын тизмесин түзүү милдеттендирилген.
Буга чейин 22-марттан 13-апрелге чейин мамлекеттик орган, мамлекеттик мекеме жана жергиликтүү өз алдынча башкаруу органдары дем алышсыз иштээри тууралуу өкмөттүн буйругу чыккан. Бирок коронавирустан улам өзгөчө абал режими 30-апрелге чейин узартылып, 25-26-апрелде дагы иштешкен.
