БИШКЕК, 13-апр. — Sputnik. Бүгүн дагы 16 медицина кызматкери коронавирус жуктурганы аныкталып, жалпы саны 79га жетти. Бул туурасында саламаттык сактоо министринин орун басары Нурболот Үсөнбаев брифинг учурунда билдирди.
Вируска кабылган медиктердин тогузу Бишкекте, төртөө Ош облусунда, экөө Ош шаарында, бирөө Баткенде иштеп жаткан.
“Медицина кызматкерлеринин жуктурганы өсүп жатканы байкалууда. Бул элди дагы кооптондуруп жатса керек. Ооругандарды тейлеп жаткан учурда бейтаптын жанында көпкө кармалып калса же эл арасында түшүндүрүү иштерин жүргүзүү учурунда жугузуп алып жатканы маалым. Ар бир фактынын комиссия аркылуу тыкыр текшерип жатабыз. Мен кесиптештериме күнөө коё албайм. Мекенге, элге кызмат кылам деп жугузуп алышууда”, — деди Үсөнбаев.
Ошондой эле министрдин орун басары Дүйнөлүк саламаттык сактоо уюмунун маалыматы боюнча дүйнөдө 22 миңден ашык медик коронавируска кабылганын айтты. Ал Италияны мисал келтирип, учурда 15 миңден ашык медицина кызматкери дарыланып жатканын билдирди.
Коронавирустун кесепети
Бишкек, Ош, Жалал-Абад шаарлары менен Сузак, Кара-Суу, Ноокат райондоруна 25-марттан 15-апрелге чейин өзгөчө абал киргизилди. Бул аймактарда саат 20:00дөн 7.00гө чейин көчөгө чыгууга тыюу салынган. Күндүз ооруканага, дарыканага жана дүкөнгө гана барууга уруксат берилген.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.
