БИШКЕК, 7-апр. — Sputnik. Кытайдын материк бөлүгүндө өткөн сутка ичинде COVID-19 вирусунан бир дагы адам каза тапкан жок. Мындай көрсөткүч январда гана болгонун РИА Новости жазды.
Ага ылайык, сутка ичинде 89 киши айыгып, 12 адам вирусту жаңыдан жуктурган.
2019-жылдын декабрь айынын аягында Ухань шаарында белгисиз өпкө оорусу жайылып баратканы байкалган. Оору деңиз азыктарын саткан базардан тараган. Адистер дарттын козгогучу коронавирустун 2019-nCoV деп аталган жаңы тиби экендигин боолголошкон. 11-март күнү Дүйнөлүк саламаттык сактоо уюму коронавирус боюнча дүйнөдө пандемия жарыялаган.
7-апрель түшкө чейинки убакытка ылайык, дүйнө боюнча коронавирусту 1 347 892 адам жуктуруп, анын 284 802си вирусту жеңди. Ал эми көз жумгандардын саны 74 808 болду.
