БИШКЕК, 2-апр. — Sputnik. Сөөк коюу зыйнатын уюштуруу жана көрүстөнгө барып-келүү үчүн бир нече адамга жана автоунаага уруксат кагаздары берилет. Бул тууралуу Бишкектин коменданты Алмаз Орозалиев брифинг учурунда айтты.
“Уруксат кагаздарын жарандар үйдөн чыкпай туруп эле электрондук түрдө алса болот. Бул нерсе бардык санитардык-эпидемиологиялык нормаларды сактоого жардам берет”, — деди Орозалиев.
Белгилей кетсек, учурда өзгөчө абал жарыяланган аймактарда жарандарга зарыл иштерин бүтүрүү үчүн ары-бери каттоого атайын уруксат кагазы электрондук түрдө бериле баштаган.
Аны алуу үчүн "Түндүк" системасына кирип, атайын форманы толтуруу керек. Кошумча суроолор пайда болсо Бишкек комендатурасына 1312 номери аркылуу кайрылса болот.
Эске салсак, Бишкек, Ош, Жалал-Абад шаарлары менен Сузак, Кара-Суу, Ноокат райондоруна өзгөчө абал киргизилип, кечки саат 20:00дөн кийин көчөгө чыгууга тыюу салынган. Мындай режим 15-апрелге чейин уланат.
